მიმდინარე წლის 21 თებერვალს, ხაშურის რაიონის ცენტრალურ პარკში შშმ ბავშვებისათვის ადაპტირებული ატრაქციონები გაიხსნა. ატრაქციონების დამონტაჟება „ქალთა ასოციაციის”ხაშურის ფილიალის ინიციატივით, საქართველოს პედაგოგთა და მეცნიერთა თავისუფალი პროფკავშირის ხაშურის რაიონული ორგანიზაციის, ორბელიანის ფონდის მხარდაჭერითა და ხაშურის მუნიციპალიტეტის თანადგომით განხორციელდა.ორბელიანის ფონდის წარმომადგენლებმა მადლობა გადაუხადეს ხაშურის მაჟორიტარ დეპუტატს და მის ბიუროს, ხაშურის მუნიციპალიტეტის გამგებელს, ა(ა)იპ „სავანეს“ და შპს „ფოლადს“ პროექტის განხორციელებაში გაწეული თანადგომისათვის.
აღსანიშნავია, რომ შშმ ბავშვებისთვის ადაპტირებული ატრაქციონები დღემდე არამხოლოდ ხაშურის მუნიციპალიტეტში, არამედ შიდა ქართლის რეგიონშიც არ არსებობდა და ეს რეგიონული მასშტაბით პირველი პრეცენდენტია. ხაშურის ცენტრში სამი ადაპტირებული საქანელა დამონტაჟდა.
გახსნის ცერემონიას ესწრებოდნენ საქართველოს პარლამენტის წევრი, ხაშურის მაჟორიტარი დეპუტატი სიმონ ნოზაძე, ხაშურის მუნიციპალიტეტის გამგებელი გიორგი გურასპაშვილი, საკრებულოს თავმჯდომარე ვაჟა შუბითიძე, მუნიციპალიტეტის, არასამთავრობო ორგანიზაციებისა და საზოგადოების წარმომადგენლები.
ატრაქციონების გახსნის შემდეგ კი შშმ ბავშვები გასართობ ცენტრში მიიწვიეს და მათ წინაშე ჯამბაზები წარსდგნენ სპეციალური ორსაათიანი პროგრამით.