საქართველოს პედაგოგთა და მეცნიერთა თავისუფალი პროფკავშირი (სპმთპ) არ მონაწილეობს, 12-13 დეკემბერს მიმდინარე, საქართველოს პროფესიული კავშირების გაერთიანების XV საიუბილეო ყრილობის მუშაობაში, შემდეგი გარემოებების გამო:
2022 წლის 22 ოქტომბერს, საქართველოს პედაგოგთა და მეცნიერთა თავისუფალი პროფკავშირის (სპმთპ) XI საანგარიშო-საარჩევნო ყრილობის მიერ მიღებულ რეზოლუციაში მკაფიოდ არის განსაზღვრული საქართველოს პროფესიული კავშირების გაერთიანების რეფორმის განხილვის წესი: სპმთპ-ის ყრილობის რეზოლუციის მე-4 პუნქტის მიხედვით ,,საქართველოს პროფესიული კავშირების გაერთიანების რეფორმასთან დაკავშირებით გადაწყვეტილებები მიღებული იქნას სპმთპ-ის უმაღლეს კოლეგიურ ორგანოზე - სპმთპ-ის ყრილობაზე, სპმთპ-ის პირველად პროფკავშირულ ორგანიზაციებსა და რაიონული/საქალაქო ორგანიზაციების/აჭარის რესპუბლიკური საბჭოს ადგილობრივ საბჭოებზე განხილვის საფუძველზე“. შესაბამისად, სპმთპ-ის პრეზიდენტის, სპმთპ-ის აღმასრულებელი საბჭოს და სპმთპ-ის XI საანგარიშო-საარჩევნო ყრილობაზე არჩეული პროფესიული კავშირების გაერთიანების ყრილობის დელეგატების კომპეტენციას სცილდება საქართველოს პროფესიული კავშირების გაერთიანების წესდების ცვლილებების პროექტის შესახებ გადაწყვეტილების მიღება.
2021 წლის 7 ოქტომბერს, საქართველოს პროფესიული კავშირების გაერთიანების მე-14 ყრილობაზე პროფესიული კავშირების გაერთიანების თავმჯდომარემ დაანონსა რეფორმა. პროფესიული კავშირების გაერთიანების XV საიუბილეო რიგგარეშე ყრილობაზე განსახილველი წესდების პროექტი სპმთპ-ში გადმოიგზავნა ერთი წლის შემდეგ - 30 ნოემბერს და ყრილობა ყრილობის თარიღად განისაზღვრა 12-13 დეკემბერი. ასეთ მოკლე პერიოდში, სპმთპ ფიზიკურად ვერ შეძლებდა გაერთიანებული პროფკავშირების წესდების ცვლილებების პროექტის განხილვას, სპმთპ-ის XI საანგარიშო-საარჩევნო ყრილობის მიერ მიღებული რეზოლუციით განსაზღვრული წესის მიხედვით.
გამომდინარე ზემოაღნიშნულიდან, 5 დეკემბერს გამართული, სპმთპ-ის აღმასრულებელი საბჭოს გადაწყვეტილების საფუძველზე, სპმთპ-ის წევრების ინტერესების გათვალისწინებით, სპმთპ არ მონაწილეობს, მიმდინარე წლის 12-13 დეკემბერს მიმდინარე პროფესიული კავშირების გაერთიანების ყრილობის მუშაობაში. საქართველოს პროფესიული კავშირების გაერთიანების წესდების პროექტის განხილვები მიმდინარეობს სპმთპ-ის 62 ადგილობრივ საბჭოსა და 2118 პირველად პროფკავშირულ ორგანიზაციაში. წევრებთან განხილვების შედეგებს შევაჯამებთ ჩვენი ორგანიზაციის რიგგარეშე ყრილობაზე, 2023 წლის თებერვლის ბოლოს. იმ შემთხვევაში, თუ რეფორმასთან დაკავშირებით, სპმთპ-ის უმაღლესი ორგანო - ყრილობა მიიღებს უარყოფით გადაწყვეტილებას, ვიტოვებთ უფლებას სპმთპ-მა დატოვოს პროფესიული კავშირების გაერთიანება ამჟამად მოქმედი წესდების შესაბამისად.
საბოლოო გადაწყვეტილების მიღებას და სპმთპ-ის რიგგარეშე XII საანგარიშო ყრილობის მოწვევას ვგეგმავთ 2023 წლის თებერვლის ბოლოს
პატივისცემით, საქართველოს პედაგოგთა და მეცნიერთა თავისუფალი პროფკავშირი